迪比宣布解僱經理人　巴塞隆拿搶人撻Q？

最強博彩盤路過關神器《串績王》：http://win.on.cc/football/　

荷蘭翼鋒迪比同里昂嘅合約即將完結，呢位27歲球星周二(18日)喺個人社交網正式宣布，佢決定同經理人公司Sports Entertainment Group(SEG)解約，自己親自決定下一步要點行。迪比拒絕續約里昂後，一直有傳將會加盟巴塞隆拿，但今次突然同經理人公司解約，令佢加盟巴塞隆拿出現變數。

迪比喺聲明入面話：「依家係時間親自掌控自己嘅職業生涯，呢個係我決定未來嘅關鍵時刻，之後嘅合約商討，我會同自己信任嘅人研究，並且由法律專家支援，我會決定自己未來點樣行，有消息會第一時間通知大家。」

近幾月一直有傳迪比正同巴塞隆拿斟介自由轉會，不過隨住巴塞隆拿教練朗奴高文面臨炒魷，迪比去同「恩師」朗奴高文合作嘅吸引力大減，加上今次突然解僱之前負責斟介嘅經理人公司，令人相信迪比已另有計劃。