修夫基爭議決定　傳阿諾特無緣歐國盃

足球博彩神器，每日重心提供盡在《彩報》：http://win.on.cc/football/　

歐國盃決賽周球隊陸續公布大軍名單，英格蘭領隊修夫基下星期二(25日)亦會決選26人，據英國媒體《The Athletic》報道，修夫基嘅腹稿已經出現，其中一個最具爭議嘅決定，就係利物浦右閘阿歷山大阿諾特將會名落孫山。

阿歷山大阿諾特喺3月份國際賽期被放棄，已經預示修夫基唔會揀佢，不過隨住歐國盃名單由23人增加至26人，令呢位利物浦球星重燃入選希望，可惜《The Athletic》內幕消息指出，修夫基仍然無意召入阿歷山大阿諾特，因為佢認為基爾獲加、捷比亞同列斯占士已足夠應付右閘所需，唔會浪費名額搵第4個右閘。

消息傳出後引起極大爭議，雖然阿歷山大阿諾特防守上有唔少弱點，但佢嘅進攻同創造力都係世界級，季中都可以批評佢狀態唔好，但自從3月國際賽被棄用後，阿歷山大阿諾特之後已入1球同交出4次助攻，仲提名英超4月份最佳球員，明顯已經回復狀態，唔少球迷都指修夫基會為呢個決定付出沉重代價。