馬古尼傷重無緣歐霸決賽 戰歐國盃亮紅燈

20210522
東網電視
更多新聞短片
即上《美職刨績王》:https://win.on.cc/football/league/mls/index.html 
曼聯下星期出戰歐霸盃決賽前收到壞消息,領隊蘇斯克查喺英超煞科戰前證實,中堅哈利馬古尼嘅傷勢仍然嚴重,下周四(27日)歐霸盃決賽對維拉利爾肯定唔踢得,而且佢係傷及足踝韌帶,英國傳媒指哈利馬古尼可唔可以趕及出戰下月歐國盃決賽周,亦係一大疑問。
哈利馬古尼喺月初贏維拉一仗受傷後,一直要拎拐杖同保護靴,不過日前出席費格遜電影嘅首映禮,呢位曼聯隊長就唔需要任何輔助自行活動,令球迷憧憬佢即將復出。可惜蘇斯克查周五(22日)表示:「佢已經可以自己行路,但由行路到可以跑步仲有一大段距離,老實講歐霸盃決賽唔會有佢份,冇可能。佢嘅足踝傷勢穩定咁康復,但真係需要時間痊愈。」
距離歐國盃決賽周開鑼只有唔夠1個月,據英國《太陽報》報道,作為英格蘭國家隊正選中堅嘅哈利馬古尼,趕唔趕得切喺決賽周首仗對克羅地亞前傷愈亦係一大疑問,出戰歐國盃亮起紅燈。英格蘭主帥修夫基一直依賴呢位曼聯球星出任左中堅位置,如果哈利馬古尼傷勢並冇突然惡化,預料修夫基亦會冒險畀佢帶傷入選。