最後一刻入波!羅拔佬打破入球王紀錄

20210523
東網電視
更多新聞短片
(Getty Images)
最強博彩盤路過關神器《串績王》:http://win.on.cc/football/ 
周六(22日)晚德甲煞科,賽前已提早穩奪冠軍嘅拜仁慕尼黑仍然全力爭勝,主場以5比2大勝奧格斯堡,前鋒羅拔利雲度夫斯基踢到90分鐘,把握1次門前執雞機會,射入個人今季第41個聯賽入球,打破1971/72年球季拜仁名宿梅拿創下嘅單季德甲最多入球紀錄。
拜仁今場狂攻對手,明顯要為「羅拔佬」創造入球機會,上半場已經領先4球,但入波球員卻係對方中堅古維利奧擺烏龍,以及基拿比、甘美治、京士利高文各建一功。
換邊之後,奧格斯堡靠安達夏恩、尼達列治拿各入1球,追至2比4,踢到90分鐘,眼見羅拔利雲度夫斯基面臨同紀錄擦身而過嘅時候,奇迹突然出現,利萊辛尼禁區頂起腳,奧格斯堡門將基爾域斯接唔實個波,羅拔利雲度夫斯基上前截到,再射入空門,驚險刷新紀錄。
賽後羅拔佬話:「實在無話可說,90分鐘內努力射門,試過所有方法,終於入波,我好高興,入波前我見到利萊辛尼射門,我估緊有冇機會補射,結果真係出現,我當然想盡早入波,感謝隊友嘅幫助。」羅拔利雲度夫斯基亦成為德甲史上首位連續4季奪得神射手殊榮嘅球員。
值得一提,奧格斯堡門將基爾域斯同羅拔利雲度夫斯基都係波蘭人,佢今場作出10次成功撲救,幾乎破壞羅拔佬好事,但最後一撲卻甩手,唔知係唔係有心幫助呢位同胞破紀錄呢?
德甲頒獎台
冠軍:拜仁慕尼黑
歐聯資格:拜仁慕尼黑、RB萊比錫、多蒙特、禾夫斯堡
歐霸盃資格:法蘭克福、利華古遜
歐協聯資格:柏林聯
護級附加賽:科隆
降班:雲達不來梅、史浩克04
神射手:羅拔利雲度夫斯基(41球)