福仔扭計想加人工　威脅有意離隊

即上《美職刨績王》：https://win.on.cc/football/league/mls/index.html　

曼聯早前同前鋒卡雲尼續約，周薪增加至25萬鎊，保羅普巴、般奴費南迪斯亦有望獲得加薪續約。另一位紅魔鬼射手拉舒福特都唔想輸蝕，趁傳媒訪問時，聲稱唔排除去其他聯賽搵食，仲話好鍾意皇馬、巴塞隆拿，擺明想逼曼聯出手加人工留住佢。

以往有傳過巴塞想簽拉舒福特，結果曼聯2019年開出20萬鎊周薪合約，同呢位23歲英格蘭國腳續約至2023年。福仔食過番尋味，又借西甲豪門過橋，佢接受英國《衞報》訪問時承認唔排除將來轉投其他聯賽球隊：「除咗曼聯之外，我都係皇馬同巴塞嘅球迷，佢哋一直以來都擁有偉大球員，踢進攻足球非常有吸引力，每個人都喜歡睇皇馬同巴塞比賽。」福仔仲透露樂意學習外語，似乎真係想出國搵食。

過去都有唔少英超球星轉戰西甲雙雄，由以往碧咸、雲尼斯達萊、奧雲、C朗，到近年加里夫巴利、蘇亞雷斯、菲臘比古天奴、夏薩特等猛將，拉舒福特除咗幫自己「抬價」之外，可能真係有意去挑戰西甲。