意甲教練大執位　派路留隊加度素落鑊

即上《美職刨績王》：https://win.on.cc/football/league/mls/index.html　

意甲球季曲終人散，又到教練大執位時間，煞科日成功殺入前4嘅祖雲達斯，教練派路賽後表明下季將會繼續執教，不過有人歡喜有人愁，失落歐聯資格嘅拿玻里，宣布教練加度素將會離隊，至於賓尼雲圖亦證實教練恩沙基離任。

派路賽後被問到去留問題，佢就回應：「贏意盃冠軍同出戰歐聯非常重要，我一直專注為祖雲達斯效力，呢個就係成績，話事人會作出決定，但我可以預見自己下季會繼續執教。」另一方面，拿玻里跌出前4位，教練加度素就付出代價，球會班主迪羅倫迪斯喺社交網證實換帥消息：「致加度素，好開心呢兩季同你合作，多謝你一直以來貢獻，希望你未來去到邊度都會獲得成功。」

另外，來季降落意乙嘅賓尼雲圖，亦都宣布教練恩沙基離隊；至於早前已落實會被摩連奴取代嘅羅馬教練方辛加，傳聞將會轉教費倫天拿。