維拉利爾「紅軍力量」衝擊曼聯

即上《美職刨績王》：https://win.on.cc/football/league/mls/index.html　

維拉利爾可以打入歐霸盃決賽，兩位「摩蘭奴」功不可沒，包括前鋒謝拉特摩蘭奴、左閘艾拔圖摩蘭奴，其中28歲嘅艾拔圖摩蘭奴曾於2014至19年效力利物浦，今場重遇「紅軍」死敵曼聯，爭勝鬥心特別強，佢話法賓奴泰華利斯等前利物浦隊友今場都撐維拉利爾擊敗紅魔鬼。

艾拔圖摩蘭奴效力利物浦5年期間，上陣141次，射入3球，佢對紅軍仍然有一份特別感情，並一直同昔日隊友保持聯繫，佢話：「法賓奴同我講，比賽當日佢將會維拉利爾嘅死忠球迷。」相信其他利物浦球員，以至紅軍球迷都會因為維拉利爾有艾拔圖摩蘭奴在陣，而全力支持呢支西甲球隊。

值得一提，艾拔圖摩蘭曾經協助西維爾奪得2013/14年球季歐霸盃冠軍，亦有份為利物浦打入2016年歐霸盃決賽，仲有2次晉身歐聯決賽，包括奪得2018/19年球季歐聯冠軍，歐洲賽大戰經常豐富。

至於謝拉特摩蘭奴今季西甲入23球，僅次於美斯，呢位西班牙國腳今屆歐霸盃已經有6球進帳，射手榜上僅落後碧斯、耶馬士、馬約萊爾1球，好有機會反超前，成為今屆神射手。