意甲教練大執位 祖記、國米新帥出爐!

2021年05月28日 08:00
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
意甲煞科唔夠1個星期,多間豪門立即上演教練大執位!多間意大利媒體證實,今季衛冕失敗嘅祖雲達斯已落實換帥,前教練阿里基歸隱2年後答應重掌帥印,並且已經簽約4年,日內會正式宣布取代派路出任祖雲達斯教練一職。另外,拉素周五(28日)突然宣布教練施蒙尼恩沙基離隊,消息指佢已經接納國際米蘭聘約。
祖雲達斯今季雖然拎到意盃冠軍,但聯賽只係喺最後一輪幸運拎到前4位置,教練派路自然要負上全責。各大傳媒報道祖雲達斯已同阿里基達成協議,呢位53歲教頭之前執教祖記5年,球隊就5奪意甲冠軍同4奪意盃冠軍,而且仲2度殺入歐聯決賽,2019年離隊後一直未有落班,今次重出江湖令球迷期待。
至於周四(27日)宣布同干地解約嘅國際米蘭,已經閃電斟妥施蒙尼恩沙基執教,拉素已率先發出聲明,證實下月約滿嘅施蒙尼恩沙基突然決定離隊:「我哋尊重施蒙尼恩沙基突然改變主意(續約),佢喺球員同教練時間都為拉素呢個家庭帶嚟成功。」消息指施蒙尼恩沙基已同國際米蘭簽約2年。
除此之外,日前將加度素炒魷嘅拿玻里,據報成功邀得史巴列堤出山執教,雙方已簽署2年合約;至於拉素就計劃斟米赫洛域同馬沙利,頂替施蒙尼恩沙基離隊嘅空缺。另一名牌球隊羅馬較早前已落實下季由摩連奴取代方辛加執教。