相隔74年　賓福特再戰頂級聯賽

足球博彩神器，每日重心提供盡在《彩報》：http://win.on.cc/football/　

賓福特喺英冠升班附加賽決賽，以2比0擊敗史雲斯，取得升上下季英超最後1個席位，相隔74年之後，終於可以再參與英格蘭頂級聯賽，新一季可望為球隊帶來2億鎊(約21億港元)收入。

賓福特今季英冠常規賽獲得第3位，未能以前2位直接升班，需要踢附加賽爭奪最後1個升班席位，佢哋喺4強淘汰般尼茅夫之後，今場決賽開波10分鐘就打開紀錄，當時史雲斯門將費迪活特文出迎，撲跌賓福特前鋒麥比奧莫，被吹罰12碼，艾雲東尼主射入網。

僅過10分鐘之後，賓福特拉開紀錄，由馬干特斯射成2比0。踢到65分鐘，史雲斯中場積富頓從後雙腳飛剷對手，被球證出示紅牌趕出場。

賓福特踢多1人優勢下，力保2比0勝果，自1947年之後，終於可以再踢頂級聯賽。預料賓福特可以從下季英超轉播費及獎金等收入，獲得2億鎊進帳，真係名利雙收。