法蘭迪保亞新陣唔掂　迪比入2粒打救荷蘭

最強博彩盤路過關神器《串績王》：http://win.on.cc/football/　

荷蘭周四(3日)凌晨熱身賽約戰蘇格蘭，領隊法蘭迪保亞賽前已經講明會試將慣常4-3-3陣式轉為5-3-2，不過新陣式明顯效果唔理想，幾乎搞到輸波收場，全靠迪比完場前1分鐘轟入靚罰球救駕，最終2度落後之下以2比2逼和蘇格蘭。

荷蘭今場改踢5-3-2希望控制中場，佢哋亦如願佔有超過6成控球率，但進攻效率明顯偏低，只係11分鐘就畀積亨特利遠射破門，盛傳即將加盟巴塞隆拿嘅迪比6分鐘後追和，但蘇格蘭喺64分鐘再由奇雲尼斯畢入波領先。法蘭迪保亞見勢色唔對，立即變番4-3-3陣式，終於喺完場前由迪比喺禁區頂博到罰球，並親自主射入網追成2比2完場。

迪比無疑係荷蘭今屆歐國盃嘅靈魂人物，佢近6場國際賽交出6個入波同2次助攻，而且喺國家隊已累積25球，超越傳奇射手雲巴士頓(24球)，迪比賽後表示：「我哋今場踢得唔好，亦未能成功轉型5-3-2，當然球隊依家仲係預備階段，好可惜贏唔到波，但都唔需要太過擔心。」