轉戰意甲！基奧特準備加盟AC米蘭

法國前鋒基奧特與車路士合約今夏完結，意大利傳媒報道，AC米蘭成功游說該34歲射手加盟，預計簽約2年，年薪大約400萬歐元。

《米蘭體育報》報道，基奧特同米蘭斟介已有一段時間，由於今夏回復自由身，吸引多間球會招手，車路士奪得歐聯後亦希望留住呢位歐聯神射手得主，不過「銀河唯一」最終決定揀咗AC米蘭，因為對方承諾會畀佢踢正選，唔使再做後備。

基奧特雖然係法國2018世盃冠軍成員，但職業生涯大部份時間都擔任後備，2018年離開阿仙奴，就係因為冇得踢正選，點知過檔車路士，經歷幾任領隊都係做後備，如今同車仔約滿，佢就決意離開，去意甲接受新挑戰。

得悉基奧特揀咗米蘭，瑞典戰神伊巴謙莫域都有回應，佢話好開心基奧特加盟：「米蘭就係需要基奧特呢類球員，佢係勝利者。」相比起伊巴，基奧特直情係「後生仔」，伊巴喺米蘭都有得踢，基奧特就唔使擔心再做後備啦。