加泰電台：巴塞簽迪比　但人工好低

《串績王》新登場，最強博彩盤路過關神器：http://win.on.cc/football/　

加泰電台報道，巴塞隆拿繼續由朗奴高文執教大致確定之後，最先引入嘅「荷蘭幫」亦揭盅，迪比同巴塞傾妥一份3年合約，將於稍後官宣，不過據報道，迪比嘅年薪係500萬歐元(約4700萬港元)，即係周薪唔夠10萬歐，又真係幾低喎。

朗奴高文留任之前，巴塞最早官宣係免費簽入阿古路，當時有報道指阿古路嘅人工都大降4成，周薪由喺曼城嘅25萬鎊減到得番15萬鎊，折合為17萬歐元。

迪比同阿古路當然好難比較，阿古路係想同美斯做隊友，而迪比就因為朗奴高文先至嚟，但去到巴塞一樣要捱低薪，周薪唔夠10萬歐元踢巴塞，雖然仲有獎金條款，但都講唔過去。

加泰電台又報道，由於巴塞開出條件太差，另一「荷蘭幫」韋拿杜姆加盟巴塞一事出現障礙，據報巴黎聖日耳門攔途截劫，向韋拿杜姆開出令佢無法拒絕嘅條件，現時韋拿杜姆仲考慮緊，究竟係捱義氣幫朗奴高文，定係去巴黎搵真銀，呢個哲學問題，大家又點睇？