奇兵五虎將 意大利暗藏神秘力量

20210606
東網電視
更多新聞短片
(Getty Images)
足球博彩神器,每日重心提供盡在《彩報》:http://win.on.cc/football/ 
意大利國家隊過去以祖雲達斯同AC米蘭球員為骨幹,但「藍衣兵團」出戰今屆歐國盃嘅大軍名單,湧現一股強大新勢力,2支意甲神奇球隊薩斯索羅、阿特蘭大合共有5人入選,隨時成為意軍突圍嘅重要力量。
講起意甲神奇球隊,大家第一時間會諗起阿特蘭大,呢支今季意甲季軍今次為意大利貢獻2位國腳,包括後衞拉菲爾杜萊、中場馬迪奧比辛拿。其中30歲嘅拉菲爾杜萊本身係巴西人,但一直未能晉身「森巴兵團」大國腳,今年毅然入籍意大利,並獲意大利主帥文仙尼徵召。
拉菲爾杜萊可以踢中堅同右閘,由於意大利2位中堅邦路斯、基亞連尼年事已高,拉菲爾杜萊正好成為最佳替補。
至於馬迪奧比辛拿本來未能入選最後26人名單,但因為史提芬奴辛斯受傷退隊,令佢獲得補選,24歲嘅馬迪奧比辛拿身高1米87,屬於意軍陣中少有嘅中場高佬,而且攻守兼備,今季為阿特蘭大入4球及2次助攻,佢喺早前熱身賽意大利對聖馬力諾,射入2球,絕對有料到。
至於薩斯索羅更加有3人入選,包括2位前鋒杜文尼高貝拉迪、拉斯柏度尼、中場文路爾盧卡迪利。當中杜文尼高貝拉迪、文路爾盧卡迪利喺上場熱身賽對捷克,都以正選上陣,杜文尼高貝拉迪仲射入1球,文仙尼表示好可能以上場正選陣容,出戰歐國盃揭幕戰對土耳其,可見佢非常滿意呢2位薩斯索羅球員嘅表現。
事實上,26歲嘅杜文尼高貝拉迪今季意甲有17球進帳,本土球員之中僅次於恩莫比尼、恩斯治尼,文仙尼以呢3人組成鋒線,可以話係大晒冷。
至於23歲嘅文路爾盧卡迪利出身於AC米蘭青訓系統,踢法似A米名將蒙杜利禾,可以同佐真奴費路組成中場雙核。
另外,文仙尼棄用今季喺巴黎聖日耳門有唔錯表現嘅摩斯堅恩,徵召剛出戰完U21歐國盃嘅拉斯柏度尼,就知呢位21歲新星好有潛力,或者佢未必有機會喺今屆歐國盃上陣,但相信已經成為文仙尼重點栽培對象。
阿特蘭大近年成為歐聯奇兵,薩斯索羅喺意甲亦有出色表現,如果「奇兵五虎將」可以將球會神秘力量帶到國家隊,意大利隨時會有驚人演出。