祖記拍廣告宣傳冇C朗　離開意甲只等官宣

足球博彩神器，每日重心提供盡在《彩報》：http://win.on.cc/football/　

C朗拿度離開祖記嘅聲音愈來愈強，意大利傳媒最近有消息指祖記拍攝名車JEEP嘅廣告時，已唔見呢位葡萄牙球星嘅蹤影，加上早前已經有傳媒爆料話C朗已將自己喺都靈嘅名車運走，睇嚟佢已經準備離開意甲。

Jeep係祖記嘅主要贊助，最近球隊為新一季拍宣傳，保羅戴巴拿、馬菲斯迪歷特、費達歷高基艾沙及基亞連尼等主要球員全部都到齊，惟獨欠缺C朗；而呢位主力射手自2018年加盟之後，該主要贊助於2019年嘅兩次及2020年嘅一次廣告拍攝，C朗都有亮相。

據《都靈體育報》表示C朗嘅種種迹象顯示，佢今個夏天就會離開祖記，而且更有可能作為換去曼聯或巴黎聖日耳門嘅籌碼。

C朗於2018年離開皇馬去到祖記，轉會費達一億歐元，而過去三個賽季，C朗為祖記兩次贏得意甲冠軍，同時亦擸走意大利盃同意大利超級盃。