德國足球里程碑　紐亞100戰創紀錄

足球博彩神器，每日重心提供盡在《彩報》：http://win.on.cc/football/　

德國國家隊向來盛產頂級門將，由美亞、舒麥加、伊拿到簡尼等等都係球壇傳奇門神，不過紐亞周二(8日)對拉脫維亞嘅熱身賽，就創造出德國足球前無古人嘅里程碑，成為德國男足史上首個100次代表國家隊把關嘅門將。

為隆重其事，紐亞今場以隊長身份上陣，開波前更獲所有德國職、球員列隊歡迎，佢亦戴上100戰特別版手套，紀念呢個重要里程碑。70年代嘅「黑燕子」美亞曾經95次為西德上陣，係最接近100戰里程碑嘅德國門將。

35歲嘅紐亞將會以正選身份為德國出戰歐國盃，今場對拉脫維亞雖然失咗1球，但紐亞表示唔會介意，仲話會宴請一班隊友食飯作為慶祝：「100次為國家隊上陣係莫大榮耀，我都好想可以大事慶祝，但依家全隊都要留喺酒店入面，不過酒店都有餐廳，我會請所有人去食飯。」