時光倒流33年　文仙尼揭幕戰首名入球

即上《美職刨績王》：https://win.on.cc/football/league/mls/index.html　

歐國盃揭幕戰將於周六(12日)凌晨舉行，A組意大利主場對土耳其，今場波對於意軍主帥文仙尼別具意義，因為佢喺1988年歐國盃揭幕戰，為意大利上陣對前西德，射入先開紀錄嘅1球，亦係佢踢國家隊首個入球。相隔33年，文仙尼首次以領隊身份帶領意大利踢歐國盃，而且又係揭幕戰，能否好似當年先聲奪人呢？

巴治奧出道之前，文仙尼曾經係意大利最天才橫溢嘅球員，協助過森多利亞、拉素奪得意甲冠軍。不過，呢位經典10號仔國際賽生涯比較遜色，僅上陣36次入4球。

文仙尼首次為意大利入波，就係1988年歐國盃揭幕戰對前西德，佢踢到52分鐘射入，可惜3分鐘後被對手逼和1比1，當年意大利最終打入4強。不過，文仙尼之後國家隊生涯不受重用，逐漸退出國際賽舞台。

時移世易，文仙尼2018年成為意大利主帥之後，率領球隊創出佳績，包括今屆歐國盃外圍賽10戰全勝，文仙尼即將領軍迎接首場決賽周比賽，兼且喺意大利舉行，配合天時地利人和，令人期待佢再次重演33年前嘅夢幻開局。