英超6隊罰錢　歐足協暫停處罰「皇巴祖」

足球博彩神器，每日重心提供盡在《彩報》：http://win.on.cc/football/　

英超賽會同英格蘭足總周四(10日)發出聯合公布，向6支參加歐洲超級聯賽球隊合共罰款2200萬鎊，叫做重輕發落，罰款將撥作草根足球及社區發展；至於仲喺歐超聯嘅皇馬、巴塞同祖記，由於要打官司，歐洲足協表示暫停紀律調查，該3隊都可以繼續參加歐聯。

先講英超6隊被罰內容，曼城、利物浦、曼聯、車路士、阿仙奴同熱刺，呢6隊已經認錯，並承諾唔會再犯，英超及英足總只係輕判罰款，6隊夾埋罰款2200萬鎊，除開每隊都唔使400萬鎊，真係冇咩感覺。

不過英超同英足總強調，如果再犯就會罰得好重，包括每隊重罰2500萬鎊，同埋罰扣英超30分。

至於歐洲足協嗰邊，由於瑞士聯邦法院通知不得處罰皇馬、巴塞同祖記，歐洲足協周四(10日)發出通告，已暫停對該3隊嘅紀律調查，並暫停處分，但就留有後着，表示會按現有規條展開獨立調查。