交換主帥？熱刺選帥搵到方辛加！

《串績王》新登場，最強博彩盤路過關神器：http://win.on.cc/football/　

英國多間傳媒報道，熱刺新球季搵領隊處處碰壁，近日又有新人選，候選人竟然係前羅馬教練方辛加！今年4月熱刺炒咗摩連奴，過咗冇耐羅馬就宣布搵「寸王」執教，而約滿離隊嘅方辛加，依家竟然有機會執教熱刺，咁咪即係交換主帥？

《天空體育》及《鏡報》報道，熱刺炒咗摩連奴後，先後同普捷天奴、干地接洽，但都「食檸檬」，尋尋覓覓，結果搵到剛喺羅馬約滿嘅方辛加，熱刺並非爭標球會，方辛加亦唔係頂級名帥，雙方一拍即合，據報雙方已進入洽談細節階段，好大機會傾成。

消息指，熱刺同方辛加將簽約到2024年，方辛加嘅年薪大約為400萬歐元，48歲嘅方辛加期待執教熱刺，即成為主席利維第11位領隊。熱刺同羅馬都係新設賽事歐協聯嘅奪標大熱，如果碰頭，雙方領隊倒戈嘅場面肯定有話題。