烏克蘭地圖波衫唔使改 俄羅斯嬲到震

2021年06月11日 23:00
東網電視
更多新聞短片
烏克蘭新波衫上的版圖含有爭議領土。
即上歐國盃專頁,每日重心提供盡在《彩報》:https://win.on.cc/ 
烏克蘭早前公布將喺今屆歐國盃着上新球衣,衫上繪上國土版圖同打氣口號,引起俄羅斯部門不滿,指烏克蘭作出政治挑釁,並向歐洲足協(UEFA)投訴。UEFA終有裁決,僅要求烏克蘭移除衣領上嘅一句口號,心口上嘅版圖就唔使改,實激到俄羅斯紥紥跳!
歐國盃位處C組嘅烏克蘭,早前公布今屆歐國盃將會着上新波衫,衫上繪畫烏克蘭國土圖案,包含2014年被俄羅斯強行吞併,並聲稱擁有主權嘅克里米亞半島,而衣領嘅正反面上,亦印有「榮歸烏克蘭」同「榮歸我們的鬥士」兩句曾經喺2014年反親俄總統亞努科維奇示威運動中,被示威者流行使用嘅政治口號。
呢件衫引起俄羅斯外交部強烈不滿,俄羅斯足總之後更加向歐洲足協投訴,要求烏克蘭除去有關繪圖同口號。烏克蘭足總主席安迪利柏禾高就解釋:「呢句口號有好長嘅傳統,球迷一直用嚟鼓勵球隊。」
歐洲足協正式就事件作出裁決,但判決會令俄羅斯更加嬲,因為UEFA僅僅要求烏克蘭移除波衫衫領內印上嘅「榮歸我們的鬥士」口號,理由為當「榮歸我們的鬥士」同「榮歸烏克蘭」兩句口號一齊用嗰陣,好明顯存在政治訊息。不過UEFA就冇接納俄羅斯就波衫上版圖印有克里米亞嘅投訴。
俄羅斯外交部發言人扎哈羅娃顯然感相當不滿,在社交媒體回應指:「體育並非戰場,係一個競技場。」而烏克蘭總統澤連斯基則繼續支持波衫設計,並形容UEFA裁決是受到政治壓力。