開齋兼破紀錄　意大利爭冠軍靠2個「恩」

即上歐國盃專頁，每日重心提供盡在《彩報》：https://win.on.cc/　

意大利周六(12日)凌晨喺歐國盃旗開得勝，雖然「藍衣軍團」貴為老牌班霸兼第10次參加決賽周，但原來3比0大勝土耳其，係意大利歷史上首次喺歐國盃決賽周單場攻入3球或以上！意大利能夠創造歷史，兩個「恩」功不可沒。

恩莫比尼今場為意大利攻入第2球，呢位金靴射手已經連續3場為意大利披甲入波，係佢繼2014世界盃同2016歐國盃「食白果」後，首次喺國際大賽決賽周入波，恩莫比尼賽後表示：「我哋今場踢得好有耐性，土耳其係支強隊，但我哋令到對手體力下降後搵到機會。能夠喺我嘅球場(奧林匹高球場，拉素主場)拎到歐國盃首個入波，實在冇得更美好。」

另一進攻核心恩斯治尼，同樣係第1次喺大賽決賽周入波，佢就歸功領隊文仙尼領導有方：「意大利最強係團隊意識，文仙尼打造一支無私嘅團隊，每人都準備好為球隊付出。我一直努力為隊友製造機會，當然贏波先係最重要，而我有入波更加係錦上添花。」