創新定多餘？運波遙控車搶意大利風頭

即上歐國盃專頁，每日重心提供盡在《彩報》：https://win.on.cc/　

延遲1年嘅歐國盃終於開鑼，意大利喺揭幕戰大勝當然威到盡，不過揭幕戰唔少風頭都畀部遙控車搶走！今場臨開波前，賽會特別安排一架贊助商Volkswagen嘅遙控車，由場邊運個波去到中圈交畀球證，呢個別開生面嘅開波方法即時成為網上熱話。

本來一個好簡單嘅動作，依家要勞煩職員將個波安裝喺特製嘅遙控車上，再人手控制佢運去球證手上，除咗要幫贊助商賣廣告之外，真係諗唔到其他原因。連見慣世面嘅意大利老將基亞連尼，見到呢個滑稽畫面都忍唔住笑。

雖然係咁，Volkswagen已經成功製造話題，唔少網民仲話呢個會係今屆歐國盃最經典一幕，英格蘭女足名將Lianne Sanderson亦喺社交網留言：「係咪得我一個想買呢部遙控車？」