PSG執到寶！當拿隆馬1場創3項紀錄

即上歐國盃專頁，每日重心提供盡在《彩報》：https://win.on.cc/　

意大利喺歐國盃揭幕戰，以3比0大勝土耳其，除咗鋒線銳利之外，防守亦好穩陣，門將基安盧基當拿隆馬力保不失，令意大利喺歐國盃決賽周累積20場不失球，成為呢項賽事史上最多「零封」對手嘅球隊，當拿隆馬亦以22歲零106日成為意大利史上出戰國際大賽(世界盃及歐國盃)最年輕上陣門將。

在此之前，意大利同德國都喺歐國盃決賽周累積19場不失球，經過今場比賽之後，意軍獨佔將最多零封紀錄。與此同時，意大利各項賽事取得9連勝兼不失球，繼續刷新球隊史上最長「連勝派蛋」紀錄。

意大利可以保住清白之身，門將基安盧基當拿隆馬功不可沒，佢已經保持國家隊賽事連續663分鐘不失球，有機會挑戰意大利傳奇門將索夫創造嘅連續1143分鐘不失球世界紀錄。

基安盧基當拿隆馬今夏約滿離開AC米蘭，盛傳將以自由身加盟法甲勁旅巴黎聖日耳門，PSG可以免轉會費簽入呢位天才鋼門，真係執到寶。