7屆大賽首仗全輸 土耳其雙星公開道歉

2021年06月12日 10:04
東網電視
更多新聞短片
即上歐國盃專頁,每日重心提供盡在《彩報》:https://win.on.cc/ 
土耳其喺歐國盃A組首仗慘吞意大利3蛋,延續球隊嘅慘烈傳統,呢支02年世界盃季軍,歷來7次出戰大賽決賽周,結果無一幸免要喺首場比賽落敗,成為參加過3屆以上大賽決賽周球隊當中,唯一一隊首戰全敗球隊。
土耳其參加過54年同02年世界盃,亦踢過96年、00年、08年、16年同埋今屆歐國盃,合共7次決賽周首戰都輸波,領隊根尼斯賽後表示:「我哋今場經常交失,根本向前推進唔到,意大利明顯係更好嗰隊,我哋輸咗畀支東道主,嚟緊仲有2場重要賽事,球員要收拾心情去準備。」
土耳其前鋒簡倫卡拉文同後防烏密特美拉斯就向國民道歉,簡倫卡拉文表示:「我哋對今場表現非常抱歉,意大利係更加優秀,依家要集中之後2場比賽。」烏密特美拉斯就話:「好對唔住,今場表現反映唔到球隊嘅決心,最後2場我哋要拎晒6分。」