人工低過邊緣人 魯迪格冇肥約就「落車」

2021年06月12日 22:00
東網電視
更多新聞短片
(Getty Images)
即上歐國盃專頁,每日重心提供盡在《彩報》:https://win.on.cc/ 
車路士啱啱先攞完歐聯冠軍,就傳出陣中主力後衞魯迪格,想喺出年完約後離隊嘅消息。皆因現時呢位德國中堅嘅人工,係隊內頭十以外,佢想另謀高就搵大錢都唔係冇道理。
28歲車路士守將魯迪格,今季為「藍軍」上陣34場攻入1球,更加係今屆贏得歐聯冠軍嘅功臣之一。之不過據悉佢依家嘅周薪只有10萬英鎊,遠不及迪姆華拿、基斯甸普列錫等主力,甚至低過真禾特、泰莫爾巴卡約高等邊緣球員。
呢位德國後衞喺2017年由羅馬「上車」,同「車仔」嘅合約只係去到2022年6月,假如車路士未能同佢傾成續約,到出年1月佢就可以開始同其他球會商討免費轉會,以佢嘅表現根本唔愁冇買家。據報道指,魯迪格本人傾向想搵一份職業生涯以來最高薪嘅合約,但佢暫時唔急於同車路士傾續約,因為想先專注喺為德國征戰歐國盃上面喎。如果車路士唔想「人財兩失」,睇嚟要出動一份「肥約」先可能打動到佢留低嘞。