西班牙隊長缺陣　曼城硬漢孭重飛

即上歐國盃專頁，每日重心提供盡在《彩報》：https://win.on.cc/　

西班牙隊長布斯基斯早前因為確診新冠肺炎，需要接受隔離，將無緣周二(15日)凌晨歐國盃E組對瑞典，預料佢嘅正選位置將由洛迪卡斯簡迪頂上。呢位曼城中場喺今屆歐聯決賽，未獲主帥哥迪奧拿信任，全場坐冷板睇波，今場正好把握機會顯身價，證明自己係當今西班牙最強防守中場。　

即將25歲嘅洛迪卡斯簡迪2年前由馬體會加盟曼城，一直屬於「藍月亮」必然正選，但今屆歐聯決賽，哥迪奧拿竟然排出「無防中」陣式，即使下半場換入防中，但都揀咗用老將費蘭甸奴，而非洛迪卡斯簡迪，令佢非常冇癮。

身高1米91嘅洛迪卡斯簡迪集力量同技術於一身，並有不俗助攻能力，上季英超入2球，上年11月歐國聯對德國，亦有1球進帳，協助西班牙大勝6比0，當時洛迪卡斯簡迪以正選踢足全場，表現搶鏡。

事實上，布斯基斯就快33歲，預料國際賽生涯已經接近尾聲，洛迪卡斯簡迪可望趁今屆歐國盃，繼承布斯基斯嘅位置。