厲害了!兩位中超兵撐起瑞典

20210613
東網電視
更多新聞短片
(Getty Images)
即上歐國盃專頁,每日重心提供盡在《彩報》:https://win.on.cc/ 
近年有唔少歐洲國腳級球員去中超掘金,今屆歐國盃亦有中超球員身影,其中瑞典就擁有2位中超兵古斯達夫史雲遜、馬古斯丹尼爾臣。司職中堅嘅馬古斯丹尼爾臣更曾於歐國盃外圍賽入波,隨時成為瑞典「秘密武器」。
現年32歲嘅馬古斯丹尼爾臣2020年2月由瑞典球會佐加頓斯轉投中超球會大連人,當時轉會費達到5,000萬瑞典克朗(約4,670萬港元),成為佐加頓斯史上最高價出售球員。
雖然馬古斯丹尼爾臣去咗中超搵食,但仍然係瑞典國家隊重要一員,事關佢擁有1米92身高,制空力強,更加不時把握死球機會,上前助攻並有收穫,包括今屆歐國盃外圍賽作客馬爾他,頂入角球。上年11月歐國聯主場對克羅地亞,馬古斯丹尼爾臣又建一功,佢9次為瑞典上陣,有3球進帳,名副其實係「帶刀侍衞」。
至於34歲嘅老將古斯達夫史雲遜現時效力廣州城,呢位防守中場有份協助瑞典打入上屆世界盃8強,大賽經驗豐富,瑞典神鋒伊巴謙莫域受傷未能參加今屆歐國盃,古斯達夫史雲遜呢種沙場老將可以發揮穩定軍心作用。