老兵不死　37歲彭迪夫入波改寫歷史

即上歐國盃專頁，每日重心提供盡在《彩報》：https://win.on.cc/　

首次打入歐國盃決賽周嘅北馬其頓，雖然第1場比賽就輸波，以1比3不敵奧地利，但總算取得球隊史上第1個歐國盃決賽周入球，而且仲係由名將彭迪夫射入，呢位前鋒更加以37歲零321日成為歐國盃史上第2大年齡入波球員。

彭迪夫絕對係北馬其頓史上最佳球員，為國家隊上陣120次，射入38球，兩項數據都係球隊史上之冠。最令人佩服係彭迪夫即使一把年紀，仍然保持高水平狀態，佢喺今季意甲為熱拿亞上陣29次，射入7球，佢能夠喺今屆歐國盃建功，並唔令人意外。

至於歐國盃史上最大年齡入波球員係奧地利名宿艾維卡華斯迪，佢喺2008年歐國盃對波蘭一役建功，當日佢已經38歲零257日。