白蘭特失控痛哭　真相令人心酸

即上歐國盃專頁，每日重心提供盡在《彩報》：https://win.on.cc/　

荷蘭喺歐國盃C組以3比2擊敗烏克蘭，比賽踢到64分鐘，「橙衣兵團」後衞戴利白蘭特被換離場時，突然失控痛哭。不過，並非因為被換走而唔開心，或者受傷，而係諗起早前丹麥國腳基斯甸艾歷臣喺比賽中一度昏迷，令曾經因為患心肌炎喺比賽中幾乎暈倒嘅戴利白蘭特一時感觸，而流下男兒淚。

賽後31歲嘅戴利白蘭特接受傳媒訪問時話：「基斯甸艾歷臣暈倒一事，對我造成好大震撼，唔止因為佢係我好朋友，亦都因為同樣事件發生喺我身上，我曾經考慮唔踢今場比賽，但有時必須用意志克服呢種想法，繼續向前邁進。」

2019年戴利白蘭特為阿積士喺歐聯上陣對華倫比亞期間，突然感覺頭暈，最後檢查發現佢患有心肌炎，需要安裝一個皮下植入式心律轉復除顫器，用來調節心率，防止心臟驟停。

戴利白蘭特上年心臟又出現問題，喺冇同任何人接觸之下，突然倒地，好彩並冇大礙。戴利白蘭特見到基斯甸艾歷臣幾乎命都冇，自己今場可以冇穿冇爛離場，難免感觸流淚。