世界足球先生5射0中　羅拔佬：對西班牙更難

即上歐國盃專頁，每日重心提供盡在《彩報》：https://win.on.cc/

波蘭喺歐國盃輸畀斯洛伐克1比2，好多球迷都跌晒眼鏡，尤其是前鋒羅拔利雲度夫斯基嘅表現更是差強人意，全場5射0正，延續咗上屆大賽0入球0助攻嘅表現。

作為2020年世界足球先生，32歲嘅羅拔利雲度夫斯基成為呢場嘅焦點，連同今場嘅數據，佢過往兩屆嘅大賽，總共射咗33腳，其中射正龍門範圍有11次，但僅入1球。

呢位拜仁王牌前鋒賽後話:「成場波嘅關鍵係果張紅牌，但即使之後我都無失望，我覺得我哋可以再射入一球，但可惜太快失第二球。」不過，佢都話球隊應該可以有更多嘅傳球及制造多啲機會，佢知道自己要盡快適應目前嘅形勢:「嚟到歐國盃決賽周就唔會有更多機會去適應，呢點我好清楚。」

下一場波蘭就會對住西班牙，「羅拔佬」知道唔易踢，「對西班牙一定係好艱苦，佢哋唔單只係我哋小組出線熱門，都係今屆嘅奪標大熱，但如果你狀態弗嘅話，一切皆有可能。」當然，要贏波唔係只靠佢一個，都要睇其他隊友能否配合。