當拿隆馬破不失球紀錄　索夫：無任歡迎

即上歐國盃專頁，每日重心提供盡在《彩報》：https://win.on.cc/

意大利啱啱喺歐國盃揭幕戰，3比0輕取土耳其，全取3分之餘，門將基安盧基當拿隆馬更連續7場保持清白之身，國家隊賽事已經連續663分鐘無失波，直迫意大利傳奇門將索夫創造嘅連續1143分鐘不失球世界紀錄。對於呢位同鄉有機會破自己紀錄，索夫就話相當開心，仲表示無任歡迎。

「如果我個紀錄能夠係今個夏天被打破，我會好開心同相當歡迎，因為意味著意大利可以殺入温布萊，不過即使當拿隆馬失波嘅話，都唔會有太大問題，因為球隊有足夠實力去扭轉局面。」索夫向意大利傳媒笑住咁講。當拿隆馬目前同索夫嘅不失球世界紀錄相差480分鐘，如果今次歐國盃要破到嘅話，球隊至少要入到決賽先有機會。

現年79歲嘅索夫球員時代替意大利國家隊出場112次，1968同1982年仲分別帶領球隊拎過歐國盃、世界盃；另外效力祖雲達斯11個賽季拎到6次聯賽冠軍，1983年正式退役。