丹麥奮戰憾負比利時 全場向艾歷臣送祝福

2021年06月18日 01:54
東網電視
更多新聞短片
(Getty Images)
荷蘭巨星柏金,全面拆解歐國盃:https://bit.ly/3zC3leS 
周五(18日)凌晨歐國盃B組大戰,比利時作客以2比1反勝丹麥,繼A組意大利之後成為今屆賽事第2支2連勝球隊,出線16強問題不大,反而丹麥2連敗陷出局邊緣,最後一輪主場必須擊敗俄羅斯,才有一線生機。
開賽前雙方交換紀念品,比利時一方向丹麥送上國家隊全隊簽名波衫,衫上印有「基斯甸」及10號,為上仗比賽期間昏迷嘅基斯甸艾歷臣打氣。丹麥帕肯球場38000人全場滿座,丹麥爆發主場威力,2分鐘,比利時後衞積臣丹拿雅交錯波,被賀積查治搶到再送個直線,尤素夫保臣同門將泰拔高圖爾斯單對單之下,輕鬆射成1比0。
比賽至10分鐘,雙方球員暫停比賽,全場球迷起立鼓掌1分鐘,就連球證都一齊拍手,向丹麥10號球員基斯甸艾歷臣送上祝福,場面令人感動。
至於場上形勢,丹麥氣勢一時無兩,壓住嚟攻,直至30分鐘比利時先至有機會打反擊,但好快又畀丹麥搶番轉頭,34分鐘,丹斯加特引球入禁區,在對方5人包圍下成功起腳,可惜僅僅貼柱出界。
世界排名第1嘅比利時下半場展示實力,奇雲迪布尼後備入替梅頓斯僅9分鐘就做到嘢,盧卡古發動反擊,右路殺上傳中,奇雲迪布尼接應後再橫傳,傳畀空晒嘅杜根夏薩特輕易射成1比1。
比利時領先後再換入夏薩特,中場人腳更齊全,戰至70分鐘,比利時一次美妙組織,由進攻右路交到左路,最後由夏薩特送交後上嘅奇雲迪布尼勁射破網,比利時反超前2比1。奇雲迪布尼入波後拒絕慶祝,以示對丹麥嘅尊重。
丹麥末段傾力反撲,87分鐘巴夫韋迪頭槌頂中楣,注定冇運,最終比利時以2比1擊敗丹麥,歐國盃2連勝。