UEFA出手！禁止球員移走贊助飲品

荷蘭巨星柏金，全面拆解歐國盃：https://bit.ly/3zC3leS　

歐國盃嘅官方飲品贊助，最近被球員喺記者會上搬嚟搬去，甚至影響賽事收入，歐洲足協終於發聲，禁止球員再移走贊助飲品。

C朗拿度日前喺記招移走兩支可口可樂，令到可樂嘅股價急跌，跟住好多球員都照樣學樣，意大利嘅文路爾盧卡迪利學足C朗，只放礦泉水喺面前，保羅普巴拎走喜力啤酒擺落地下，啱啱烏克蘭星級前鋒耶莫蘭高，反而將幾支贊助飲品放埋一齊，爆笑「搲撈」，將原本放喺枱面上嘅贊助飲品擺到亂晒龍。

歐洲足協（UEFA）已經向24支參賽球隊表明，禁止再有球員移走記者會上嘅贊助飲品，2020歐國盃賽事總監馬田卡倫(Martin Kallen)強調贊助商對賽事同埋歐洲足球都好重要，佢哋都係賽事嘅一部份。

不過，佢哋唔會對C朗等作出處罰，而佢哋話凡事都有例外，如果基於宗教理由就唔包括在內，即好似普巴等穆斯林球員就可以諒解，但強調要尊重每位贊助商。其實，今屆贊助嘅喜力啤酒好似係無酒精喎。