費Sir碧咸師徒現場發功　梗係打和啦

即上歐國盃專頁，每日重心提供盡在《彩報》：https://win.on.cc/　

周六(19日)凌晨歐國盃D組英格蘭主場對蘇格蘭，倫敦溫布萊球場看台上星光熠熠，包括曼聯傳奇人物費格遜同碧咸都係座上客。不過，兩師徒今場各為其主，費Sir係蘇格蘭名帥，而碧咸係前英格蘭國腳，咁啱今場兩隊打和0比0，兩師徒可以和氣收場。

碧咸同18歲囝囝羅密歐一齊入場睇波，兩父子型到爆，至於費格遜入場前遇到阻滯，球場保安竟然唔畀佢喺VIP車位泊車，搞到佢老人家好冇癮。

費Sir亦應該唔滿意今場賽果，因為蘇格蘭繼首場0比2不敵捷克之後，今場又打和0比0，仲未入到波，僅得1分，排小組包尾，如果下場贏唔到克羅地亞，就會出局，曾於1985至86年執教過蘇格蘭嘅費格遜可能要幫幫手，教番蘇格蘭領隊奇勒幾招破敵計仔。