查漢奴古打錯算盤 AC米蘭新約縮水

2021年06月19日 21:01
東網電視
更多新聞短片
最強博彩盤路過關神器《串績王》:http://win.on.cc/football/ 
土耳其喺今屆歐國盃表現令人失望,頭2輪分組賽全敗,冇入波兼失5球,貴為球隊中場靈魂嘅查漢奴古亦冇表現,唔單止球迷失望,呢位即將回復自由身嘅AC米蘭中場,亦都打錯如意算盤。據報查漢奴古原本打算借歐國盃「抬身價」,結果適得其反,AC米蘭甚至打算將新約「縮水」。
據意大利《米蘭體育報》消息,AC米蘭喺歐國盃前向查漢奴古開出年薪500萬歐元新約,不過呢位土耳其中場就「吊高嚟賣」,打算借歐國盃決賽周抬高身價後先作決定,可惜佢喺頭2場比賽完全冇料到,據報除咗早前被查漢奴古拒絕嘅中東聘約外,依家仍然只係得AC米蘭一份合約,其他傳聞球會都另有目標,暫時未有任何動作。
27歲嘅查漢奴古經過歐國盃失望演出後,可唔可以得到比AC米蘭更吸引嘅斟介成為疑問,《米蘭體育報》指AC米蘭更計劃降低出手,將合約內嘅固定薪身比率降低,轉為以獎金方式支付,明顯係睇死查漢奴古冇其他選擇,最後會乖乖續約。