克羅地亞絕處逢生　神級莫迪歷威足13年

即上歐國盃專頁，每日重心提供盡在《彩報》：https://win.on.cc/　

克羅地亞喺歐國盃D組最後一輪絕處逢生，作客3比1擊敗蘇格蘭後，成功力壓捷克取得小組次名出線，今場交出1射1傳嘅莫迪歷再次成為出線英雄。呢位35歲中場喺08年歐國盃已為克羅地亞入波，成為球隊史上最年輕歐國盃入球者(22歲273日)，今場佢入波後亦成為克羅地亞最老歐國盃入球者(35歲286日)，威足13年！

莫迪歷下半場以一記世界波為克羅地亞再度領先，比賽尾段再交出助攻畀比列錫鎖定勝局。數據顯示，莫迪歷今場有115次觸球，98次傳送有高達88%成功率，當中10次長傳有7次成功，就連爭波、解圍同攔截等防守數據都有各1次紀錄，加上最重要嘅入波同助攻，呢位35歲老人家今場演出可謂八面玲瓏。

莫迪歷賽後表示：「我好開心，因為我哋贏咗一場好重要嘅比賽而且晉級，頭2場嘅表現令人失望，但我哋知道自己可以做得更好，當克羅地亞打出呢種表現，就唔需要懼怕任何對手。」