見過鬼唔怕黑　賴斯又同球會隊友吹水

最強博彩盤路過關神器《串績王》：http://win.on.cc/football/　

英格蘭上場同蘇格蘭打和後，美臣蒙特同芝維爾完場嗰陣同車路士隊友比利基莫亞「聚舊」，結果該蘇格蘭球星事後確診新冠肺炎，連累兩位英格蘭球星都要接受隔離。但見過鬼都未必會怕黑，英格蘭贏捷克之後，中場迪格蘭賴斯竟然重蹈覆轍，走去同2個捷克嘅韋斯咸隊友吹水。

今場比賽完結後，迪格蘭賴斯就同華迪美高法爾擁抱，之後另一捷克國腳湯馬士蘇錫克亦都加入組成「韋斯咸同學會」，3人唔戴口罩企喺度傾咗冇耐，即有溫布萊球場職員走嚟叫佢哋保持社交距離，仲拎埋口罩畀佢哋即刻戴上。

愛爾蘭名宿堅尼喺今場賽事，就批評芝維爾同美臣蒙特「攞嚟衰」：「我唔明點解要同對手球員傾偈，仲要超過20分鐘，我唔理佢係咪你嘅球會隊友，我好少同人傾偈超過5分鐘，尤其係經歷完一場戰爭後，點解要同對手傾咁長時間，有少少常識都唔會咁做啦。」