【官宣】一個原因　查漢奴古反骨轉投國米

即上歐國盃專頁，每日重心提供盡在《彩報》：https://win.on.cc/　

意甲冠軍國際米蘭正式宣布，簽入今夏自由身嘅土耳其國腳查漢奴古，雙方簽約至2024年6月30日。現年27歲嘅查漢奴古過去4季都係AC米蘭中場主將，但卻選擇轉投A米同市死敵國米，原來只為多50萬歐元年薪。

查漢奴古2017年由利華古遜加盟AC米蘭，身穿10號球衣成為球隊中場大腦，佢近4季總共為A米上陣172場，射入32球及48次助攻，上季協助球隊成為意甲亞軍，獲得下季歐聯席位。

查漢奴古今夏約滿，A米曾經向佢開出400萬歐元年薪續約，國米加碼以450萬歐元年薪利誘佢，最終查漢奴古向錢看，選擇做「叛徙」加盟國米，難怪被A米球迷鬧係僱用兵，只為錢踢波。

國際米蘭之所以簽入查漢奴古，主要原因係要代替基斯甸艾歷臣，呢位丹麥國腳喺歐國盃期間，出現心臟問題，球員生涯或會結束。

查漢奴古喺今屆歐國盃表現欠佳，踢3場只有1次助攻，土耳其亦3戰全敗出局。