西班牙連續射失5個12碼　莫拉達另類貢獻　

荷蘭巨星柏金，全面拆解歐國盃：https://bit.ly/3zC3leS　

西班牙喺分組賽最後一輪5比0大炒斯洛伐克，創造今屆決賽周目前最大勝仗，不過前鋒艾華路莫拉達嘅「敗家」問題仍然持續，佢今場本來有機會靠12碼先開紀錄，但射門被對方門將杜巴夫卡擋出。連埋呢球在內，西班牙已經連續5球12碼宴客，認真慘情。

西班牙喺上年11月歐國聯對瑞士，沙治奧拉莫斯喺半個鐘頭之內2次射失12碼，成為呢個「宴客魔咒」開始；月初對立陶宛嘅熱身賽，西班牙被逼派出U21出戰贏4比0，但小將艾比雷斯同樣喺賽事中射失12碼；分組賽第2輪對波蘭，輪到謝拉特摩蘭奴失手，今場艾華路莫拉達就上演「宴客第5擊」。

好在西班牙今場最終大勝出線，布斯基斯賽後就話係艾華路莫拉達個12碼激發起全隊鬥志：「我哋當然想射入個12碼，艾華路莫拉達肯定都想射入，但足球就係咁樣，第1件事係你要有勇氣去操刀，今次宴客多少激起全隊嘅怒火，大家都有非常好嘅回應。」