英格蘭緊要過曼聯　福仔揀歐國盃後做手術

即上歐國盃專頁，每日重心提供盡在《彩報》：https://win.on.cc/　

英格蘭向住歐國盃冠軍目標邁進，前鋒拉舒福特喺分組賽上陣時間唔多，據報佢原來一直受到膊頭傷患困擾，不過呢位曼聯前鋒就認為幫英格蘭踢歐國盃先係「重中之重」，所以決定捱到歐國盃完結後先考慮做手術，有可能會缺席下季英超季初賽事。

其實拉舒福特喺上季尾已經膊頭受傷，但為咗出戰歐國盃寧願強忍痛楚，「福仔」日前表示：「我唔肯定膊頭傷勢係咪要做手術，呢個問題要等到決賽周完結後先至考慮，我嚟英格蘭報到前，已經清楚知道一定唔可以喺歐國盃前做手術，所以我連手術之後要抖幾耐都冇問醫生，只係想盡可能踢好今屆賽事。」

英國《太陽報》消息指，拉舒福特會喺歐國盃後先休息，再諮詢醫生嘅意見，如果最後真係要做手術，曼聯下季英超季初比賽都唔使預佢。