24次射門0入球　葡萄牙創歐國盃最差成績

荷蘭巨星柏金，全面拆解歐國盃：https://bit.ly/3zC3leS　

葡萄牙喺歐國盃16強對比利時，全場有24次射門，成為今屆賽事單場最多射門，但又入唔到波嘅球隊。反觀，比利時6次射門1次中目標就入波。最令葡萄牙球迷心碎係球隊16強出局，成為葡萄牙參加歐國盃決賽周以來，最差成績。

葡萄牙1984年首次打入歐國盃決賽周，就晉身4強，1996年第2次參賽亦有8強，其後2000年至2016年，5屆賽事之中，最少都入8強，其中2次4強止步，2次入決賽，包括上屆奪得冠軍。

因此，葡萄牙今屆以衞冕身份參賽，但16強就出局，難免令人失望，賽後C朗更怒掟隊長臂章，明顯非常不滿球隊表現。

不過，要留意上屆歐國盃決賽周先至首次擴軍至24隊，分組賽之後多咗一輪16強賽事，葡萄牙1996、2008年8強出局，其實都等同首輪淘汰賽出局。