基拿比係「倫敦之王」　要射爆英格蘭

即上歐國盃專頁，每日重心提供盡在《彩報》：https://win.on.cc/　

周三(30日)凌晨歐國盃將上演16強大戰，英格蘭主場對德國，今場波喺倫敦溫布萊球場舉行，但可能反而對德國更加有利，因為隊內有位「倫敦之王」，佢就係基拿比。呢位25歲翼鋒2019/20年球季為拜仁慕尼黑出戰歐聯，作客倫敦鬥熱刺、車路士，2場合共射入6球，佢話好享受喺倫敦比賽，有信心今場入波。

基拿比的確係1位「倫敦通」，因為佢曾經喺阿仙奴受訓，並於2012至16年效力呢支倫敦球隊，其後返回德國搵食。基拿比話：「我無論幾時來到倫敦都好享受比賽，感覺好自在，喺倫敦入波非常令人興奮，希望每次喺倫敦比賽，都可以取得入球。」

2019年10月歐聯分組賽，拜仁慕尼黑作客熱刺，基拿比射入4球，協助球隊大勝7比2。去到16強首回合，拜仁作客大勝車路士3比0，基拿比個人梅開二度，「倫敦之王」當之無愧。

基拿比喺今屆歐國盃3次正選上陣，都未能取得入球，今場重返「福地」比賽，應該都係時候開齋。