北歐迪布尼！瑞典有位高效助攻王

最強博彩盤路過關神器《串績王》：http://win.on.cc/football/　

比利時中場奇雲迪布尼以精準妙傳聞名於世，原來瑞典都有1位「北歐迪布尼」，佢就係中場古路施夫斯基。呢位21歲新星早前因為確診新冠肺炎，缺陣頭2場分組賽，佢上場對波蘭復出，後備上陣立即貢獻2次助攻，成為贏波功臣。瑞典能否喺16強擊敗烏克蘭，古路施夫斯基發揮成為關鍵。

古路施夫斯基雖然係瑞典人，但佢其實出身於意甲球隊阿特蘭大青年軍，2019/20年球季被外借去帕爾馬期間，喺意甲上陣36場射入10球，隨即被祖雲達斯以3,500萬歐元收購，佢今季為祖記各項賽事上陣47場入7球。

AC米蘭嘅瑞典神鋒伊巴謙莫域都非常欣賞呢位後輩，上年9月歐國聯瑞典對法國，古路施夫斯基擔任後備，最後20分鐘先至獲派上陣，當時伊巴謙莫域都為佢抱不平，直斥瑞典領隊贊尼安達臣唔識用人，可見古路施夫斯基喺伊巴眼中有好大份量。如果贊尼安達臣想瑞典順利晉級，今場16強最好都係搵古路施夫斯基擔正。