超級入球騷!西班牙加時擊敗克羅地亞入8強

2021年06月29日 02:35
東網電視
更多新聞短片
(Getty Images)
荷蘭巨星柏金,全面拆解歐國盃:https://bit.ly/3zC3leS 
周二(29日)凌晨歐國盃16強賽事,克羅地亞於哥本哈根中立場火併西班牙。雙方激戰下演變成入球騷,在互有領先下法定時間踢成3比3,最終西班牙加時以5比3戰勝克羅地亞,殺入8強,下仗將會與法國或瑞士勝方交鋒。
西班牙今仗前鋒繼續起用「敗家仔」艾華路莫拉達,拍住費倫托利斯,上場踢得好嘅沙拉比亞繼續擔正,克羅地亞冇咗比列錫,就由列比錫打左翼,右翼起用尼高拉華錫。
西班牙鍾意踢控傳,一開波就主動搶攻,14分鐘有單刀機會,佐治高基面對克羅地亞門將利華高域,竟然射中間,結果被擋出。19分鐘莫拉達門前頭槌頂失,連續錯失兩個機會,跟住後防竟然派膠失波。
20分鐘,今屆賽事獲委以重任嘅西班牙門將烏尼西蒙接應柏迪回傳,個波喺佢腳邊漏過再碌入網窩,擺烏龍先輸0比1,整個過程完全無壓力,仲肉酸過上場斯洛伐克門將杜巴夫卡嘅「學界級烏龍」,呢個算係「業餘級烏龍」,亦係今屆第9個烏龍波。
西班牙定一定神再嚟過,38分鐘一次連環攻勢,克羅地亞解唔到圍,荷西加耶勁射被利華高域擋出,沙拉比亞補射今次冇得救,西班牙追和1比1。
下半場西班牙繼續攻,57分鐘,艾斯派古達接應費倫托利斯左路底線傳中,遠柱頭槌頂入,西班牙反超前2比1。其後克羅地亞谷上前搶攻,烏尼西蒙將功贖罪,擋住對方攻勢,76分鐘費倫托利斯為西班牙射成3比1,以為贏得,點知臨尾先係戲肉。
克羅地亞末段反撲,先於85分鐘憑米斯拿夫柯錫追番1粒,柏沙歷再於補時2分鐘頭槌破網,連入2球追成3比3,將賽事帶入加時。
加時上半場,艾華路莫拉達及奧耶沙巴爾各建一功,為西班牙射成5比3。之後西班牙唔再大意,克羅地亞亦谷唔起,最終西班牙保持勝局完場。