邊個話唔飲得汽水？格列沙加飲到變MVP

荷蘭巨星柏金，全面拆解歐國盃：https://bit.ly/3zC3leS　

瑞士喺歐國盃16強踢出熱血一仗，眾志成城下逼和法國3比3，再憑互射12碼將巨人擊倒！瑞士中場格列沙加今場演出八面玲瓏，賽後獲歐洲足協選為今場MVP，除咗格列沙加威水之外，今屆受到C朗拿度等多位球星「打壓」嘅可樂亦都出番啖氣，事關格列沙加今場被影到全程狂飲可樂，吐氣揚眉。

盛傳即將會轉投羅馬嘅格列沙加，今場面對保羅普巴同尼高路簡迪，中場爭奪絕不輸蝕，錄得92%傳球成功率，8次長傳全部到位，而且仲製造3次機會同交出1個助攻。格列沙加賽後表示：「我哋今場創造歷史，非常自豪，8強對西班牙肯定好難踢，但我哋依家好似發緊夢一樣。」美中不足係，格列沙加今場拎到黃牌，意味佢要喺8強對西班牙停賽，對瑞士影響極大。

有趣嘅係，格列沙加今場喺飲水時間，人人飲水嗰陣就得佢一個拎住支可樂狂隊，就連互射12碼前圍圈打氣，佢都仲揸住支可樂喺中間鼓勵隊友，睇怕格列沙加好快可以拎到一份新嘅代言合約！