地獄賽程!西班牙6壯士要踢埋奧運足球

2021年06月30日 16:01
東網電視
更多新聞短片
(Getty Images)
即上歐國盃專頁,每日重心提供盡在《彩報》:https://win.on.cc/ 
西班牙打入歐國盃8強,陣中有6位球員亦被選入奧運男足名單,出戰7月東京奧運,今個夏天真係踢要腳軟。據悉,巴塞隆拿會方擔心中場新星柏迪踢晒歐國盃及奧運,會影響備戰新球季,計劃同西班牙足總談判,要求豁免呢位18歲中場出戰奧運。
西班牙陣中6位奧運腳包括門將烏尼西蒙、中堅艾利加西亞、柏奧托利斯、中場丹尼爾奧莫、柏迪、前鋒奧耶沙巴爾。其中柏迪屬於西班牙大國腳絕對主力,佢喺今屆歐國盃踢足4場,而且冇被換走過,包括上場16強同克羅地亞激戰120分鐘。
雖然呢位新星年輕當打,但如果踢埋奧運賽事,意味今個夏天冇時間休息,所以巴塞會方希望西班牙足總豁免柏迪踢奧運。
今屆歐國盃決賽將於香港時間7月12日凌晨舉行,東京奧運足球賽事將於7月22日至8月7日舉行,新一季西甲將於8月13日開鑼。
如果西班牙打入奧運男足決賽,意味呢6位奧運腳整個夏天都有比賽,球會需要額外畀時間佢哋休息,無可避免將會缺席季前集訓及季初賽事,佢哋所屬球會肯定頭痕。