西班牙12碼挫瑞士 率先晉級歐國盃4強

2021年07月03日 02:48
東網電視
更多新聞短片
(Getty Images)
即上歐國盃專頁,每日重心提供盡在《彩報》:https://win.on.cc/ 
周六(3日)凌晨歐國盃8強展開,瑞士於俄羅斯中立場火併西班牙。瑞士在早段先失烏龍波其後一度追和,戰至末段10人應戰下力守至加時完場,要靠互射12碼分勝負,最終西班牙贏3比1晉級,下仗將會對比利時或意大利勝方。
西班牙繼續強陣出擊,前鋒艾華路莫拉達夥拍費倫托利斯及沙拉比亞,繼續以控傳踢法主導比賽;瑞士在隊長格列沙加停賽下,改派薩卡利亞披甲,豈料瑞士輸第1球就同佢有關,前線由雙箭頭改為施費洛域單箭頭,比列安保路退後一格在右路打側擊,但佢上半場初段傷出,打亂部署。
西班牙首個攻勢就領先,8分鐘,佐治高基開角球,佐迪艾巴禁區外接應起腳施射,薩卡利亞舉腳攔截但又閂唔晒,皮球改變方向入網,西班牙開局領先1比0,賽會計薩卡利亞擺烏龍,亦係今屆賽事第10個烏龍波。
瑞士勝在夠爛打,落後1球下力追,前場逼搶搵機會,不過冇咗沙加帶住始終爭啲,西班牙早入波反而冇咁放,踢得好小心,反而畀瑞士唔少控球時間。
下半場西班牙以丹尼爾奧莫換入沙拉比亞,但賽事緩慢進行,西班牙手執1球唔急於搶攻,瑞士亦有心無力,再過10分鐘,冇乜波踢嘅艾華路莫拉達亦被換出,由謝拉特摩蘭奴入替。
56分鐘,薩卡利亞接應角球頭槌攻門,西班牙門將烏尼西蒙冇晒反應,但係皮球之差一個波位出界,薩卡利亞未能將功贖罪。64分鐘,史堤芬蘇巴同魯賓華加斯做配合,打到入小禁區,但史堤芬蘇巴射波冇力被救出。
68分鐘,西班牙後防自己犯錯,拿樸迪同柏奧托利斯誤會,畀瑞士費奧拿攞波入禁區,再橫傳畀梳頓沙基利射成1比1。77分鐘,瑞士中場費奧拿飛剷謝拉特摩蘭奴,被罰紅牌離場,瑞士僅餘10人應戰,全軍縮後守和完場,將賽事帶入加時。
西班牙加時期間狂攻,瑞士門將恩尼森馬左飛右撲,佢哋上仗加時守和法國,再憑互射12碼晉級,今次一樣守到完場,捱到互射12碼分勝負,不過最終由西班牙獲勝。
互射12碼情況
布斯基斯X
加雲洛域○
丹尼爾奧莫○
法比安舒哈X
洛迪卡斯簡迪X
文路爾艾簡治X
謝拉特摩蘭奴○
魯賓華加斯X
奧耶沙巴爾○