恩斯治尼變搶手貨　熱刺同巴塞隆拿出招

最強博彩盤路過關神器《串績王》：http://win.on.cc/football/　

意大利今屆歐國盃有表現突出，「10號仔」恩斯治尼更加大放異彩，呢位拿玻里前鋒同球會合約只係剩番1年，續約談判亦遲遲未有進展，據意大利傳媒爆料，熱刺同巴塞隆拿都已經準備乘虛而入，並且同恩斯治尼經理人進行接觸。

30歲嘅恩斯治尼向來好波，不過出道以來一直效力拿玻里嘅佢，喺國際舞台表演機會唔多，今屆歐國盃大爆發就令佢即時「升呢」，引起唔少豪門關注。意大利《米蘭體育報》報道，拿玻里未能滿足恩斯治尼要求嘅430萬鎊年薪，令續約談判陷入僵局。

報道指熱刺同巴塞隆拿正密切注視情況，而且已經同恩斯治尼嘅經理人進行初步接洽，如果恩斯治尼仍然拒絕續約，拿玻里為免下年人財兩失，將會被逼喺今個夏天將佢賣走。恩斯治尼喺歐國盃後身價水漲船高，唔愁搵唔到好球會落班。