當拿隆馬做英雄 意大利12碼贏西班牙入決賽

2021年07月07日 05:45
東網電視
更多新聞短片
荷蘭巨星柏金,全面拆解歐國盃:https://bit.ly/3zC3leS 
意大利殺入歐國盃決賽!周三(7日)凌晨歐國盃4強大戰,意大利同西班牙激戰120分鐘踢成1比1平手,互射12碼階段,西班牙有入球英雄艾華路莫拉達射失關鍵一球,意大利最終互射12碼贏4比2,繼2012年後再度殺入歐國盃決賽。
西班牙今場變陣,今屆場場正選嘅艾華路莫拉達意外被收起,改用奧耶沙巴爾出任「假9」,早段同意大利進行激烈中場爭奪,成功拎到主動權,15分鐘費倫托利斯禁區外射門未能命中,25分鐘丹尼爾奧莫禁區正中間有起腳機會,但意大利門將基安盧基當拿隆馬反應快擋出。意大利完半場前更有黃金機會,艾馬臣柏美尼左路窄位狂抽,可惜中楣彈出。
下半場意大利加強進攻,同西班牙上演鬥攻好戲,意大利前鋒恩莫比尼48分鐘禁區外挑射斜出,西班牙中場布斯基斯53分鐘禁區頂射門亦貼楣而出,奧耶沙巴爾5分鐘後遠射角度太正被接實。60分鐘意大利快速反擊,恩莫比尼埋門被解圍,費達歷高基艾沙截到後殺入禁區熨射遠柱入網。
西班牙落後下即時換入艾華路莫拉達搏殺,果然喺80分鐘收到效果,呢位前鋒同丹尼爾奧莫一次美妙撞牆突破防線,艾華路莫拉達單刀輕鬆追成平手,將比賽帶入加時。西班牙喺加時控制大局,98分鐘丹尼爾奧莫罰球直射被基安盧基當拿隆馬擋出,但意大利仍能堅守城池,120分鐘踢成1比1平手。
互射12碼階段,雙方第1輪齊齊宴客,去到關鍵嘅第4輪,西班牙入波英雄艾華路莫拉達射門被基安盧基當拿隆馬救出,意大利由佐真奴費路射入致勝球,互射12碼贏4比2率先殺入決賽。
【12碼回放】
文路爾盧卡迪利(意) X
丹尼爾奧莫(西) X
比洛迪(意) ○
謝拉特摩蘭奴(西) ○
邦路斯(意) ○
堤亞高艾簡達拿(西) ○
貝拿迪斯治(意) ○
艾華路莫拉達(西) X
佐真奴費路(意) ○