佐真奴決賽大師　捧盃有機贏埋金球獎

荷蘭巨星柏金，全面拆解歐國盃：https://bit.ly/3zC3leS　

意大利喺歐國盃4強互射12碼淘汰西班牙，射入致勝球嘅佐真奴費路再成球隊無名英雄，佢今場作出咗7次成功攔截，係今屆歐國盃單場最高紀錄。自2018年加盟車路士後，佐真奴費路參加嘅每項盃賽都成功殺入決賽，「恩師」沙利更指意大利如果成功捧盃，佐真奴費路有望拎到今年金球獎！

佐真奴費路過去3年，先後殺入歐聯、歐霸、英足盃、英聯盃同歐國盃決賽，雖然3次英格蘭本土盃賽都飲恨，但喺歐聯同歐霸兩大賽事都成功奪冠。呢位中場今屆6場比賽全部踢正選，當中5場係踢足全場，包括16強同4強踢足120分鐘，絕對係意大利中場命脈。

佐真奴費路3年前加盟車路士，被唔少球迷批評唔識防守、駁腳機器，重用佢嘅領隊沙利亦飽受批評，今屆佐真奴費路先贏歐聯，依家仲有機會贏埋歐國盃，沙利表示：「佐真奴係好特別嘅球員，或者唔係太多人明白，但佢非常出色同聰明，將所有事情變得簡單，球迷睇落唔會好搶眼，但呢個就係佢偉大之處。如果意大利捧盃，佐真奴絕對會係金球獎熱門人選。」