西班牙年輕有前途　安歷基笑住出局

荷蘭巨星柏金，全面拆解歐國盃：https://bit.ly/3zC3leS　

西班牙今屆歐國盃4強止步，不過呢支以年輕球員掛帥嘅球隊表現唔差，尤其18歲新星柏迪表現光芒四射，西班牙今場正選陣容平均年齡只有25歲352日，係自64年歐國盃決賽對蘇聯(25歲209日)後，西班牙喺歐國盃淘汰賽最年輕陣容，領隊安歷基出局後都話球隊雖敗猶榮，佢並唔覺得傷感。

互射12碼不幸出局，西班牙足總主席返到更衣室後都向球隊鼓掌，讚揚佢哋今屆表現突出。安歷基賽後表示：「對我嚟講呢一晚並唔傷感，只係對戰果有啲失望，決賽周前我話西班牙係8支有機會奪冠嘅球隊之一，最終證明我冇講錯，我哋係今屆其中一支表現最好嘅球隊，亦見到球隊有競爭力，我會畀球員A-，如果贏埋就有A+。」

西班牙有費倫托利斯、丹尼爾奧莫等新人上位，巴塞隆拿中場柏迪更加以18歲223日之齡，成為歐國盃史上最年輕喺4強踢正選球員，安歷基賽後表示：「我從來未見過1個18歲球員可以喺歐國盃、世界盃或者奧運有咁嘅表現，超乎現實，就連恩尼斯達都做唔到！」